٢٠٠٧-٠٨-١٩

هى العربيات فين ؟؟؟؟

يوم الجمعه اللى فاتت كان ابويا معزوم على الغدا عند م.نبيل مقبل ... شويه وعرفنا انهم راحوا قبضوا على كل اللى راحوا يتغدوا ... يمكن يكون ده تمهيد لتعديلات دستوريه جديده تمنع اى حد يروح يتغدى عند أى حد
برضه مش دى المشكله ........ المشكله اننا قعدنا ندوّر لحد الساعه 2 بالليل على عربيه أبويا وعربية د. سناء وعربية د. عصام .... وليس لهم أى أثر
المفاجأه إننا تانى يوم لما رحنالهم النيابه عرفنا إن جحافل أمن الدوله بعد ما أخدوهم قاموا خدوا العربيات على مقر أمن الدوله اللى فى شارع جابر بن حيان فى الدقى
برضه مش دى المشكله ........ المشكله إن جهاز أمن الدوله السمعه بتاعته بقت دون مستوى الشبهات (طبعاً هى كده من زماااااااان) بس زادت شويتين بعد موضوع الخزينه بتاعت أ.حسن مالك اللى نهبوا اللى فيها
الخلاصه : ربنا يستر والعربيات ما تحصلش خزينه أ. مالك ونعرف نرجعها ...... دعواتكم

هناك ١١ تعليقًا:

غير معرف يقول...

هيا كلمه من ثلاث حروف
والجميع عارفها
بالفعل لازم اقولها
ولا بلاش عربيتي في خطر

غير معرف يقول...

بجد رايح يتغدا
كلام غريب اوى يا احمد
ولا انت فاكر ان انت بتكلم ناس فى حضانه مثلا
يعنى الحكومة هبله وبتعملنا اننا هبل واتعودنا على كده
ما تبقاش زيهم يا ابوحميد والله احنا ماهبل يا سيدي
ربنا يحفظ والدك ويحفظ كل شريف يدافع عن البلد
وربط الله على قلوب زويهم

غير معرف يقول...

ايه يابو سيف ياخي الحكومة عرفت انهم راحوا يتغدوا ولما عملوا التحريات اللازمة اكتشفوا مفاجأة مهمة جداً وهى إن الدكتور نبيل ماكنش عنده الحلو فقالوا ناخدهم يحلوا عندنا
ماتقلقاش أوى على الحج سيد
يومين ثلاثة ويوم مايتأخر أوى بالكتير عشر سنين تانية
ياكل الحلو ويرجع بالسلامة وربنا يجعلوا فى ميزان حسناته

طارق أبو جنى

أبوســـيف يقول...

ايوه رايح يتغدى ... يعنى انا حأكذب مثلاً .... دى الحاجه اللى متأكد منها انهم يوميها كانوا حيتغدوا سوا ... و م. نبيل أبو الكرم كله

احتمال كان الكلام بينهم عن حزب الإخوان الجديد أو لمناقشة أى موضوع داخل الإخوان

ومش القصد طبعاً انى اعتبر زوار المدونه فى حضانه لا سمح الله .. مع كامل الإحترام للناس بتوع الحضانه أحسن حد فيهم يطلع قريب حد من المسئولين

غير معرف يقول...

فك الله أسر جميع الشرفاء والاحرار في هذا الوطن المنكوب والعصر النكد، هذه ياأخي ضريبة الحرية والكرامه والإيمان بالمباديء يدفعها قادة المؤمنين بها، الحمد لله الذي جعل ابيك واخوانه فتنه للذين كفروا والذين نافقوا وتثبيتا لنا وللمؤمنين والنصر ات لامحالة " ويومئذ يفرح المؤمنون بنصر الله"..

abonazzara يقول...
أزال المؤلف هذا التعليق.
abonazzara يقول...


فيه ايه ياعم الحاج
شوية ناس محترمين قاعدين مع بعضهم لا فيه جوزة في النص ولا وساخة ولا قلة أدب ولا مسئول أمريكي ولا إسرائيلي بياخد أخبار ولا بيملي شروط وتعليمات وقاعدين في ملك واحد منهم اللي جابه بفلوسه مش بدمنا ولا بلحمنا ولا بعرضنا وبصحتنا لا فيهم نصاب ولا مرتشي ولا حرامي ولا داعر ولا لص بنوك ولا مستولي على أراضي الدولة ولا نائب قروض ولا نائب رقاصات ولا شيوعي سابق ووطني حالي ولا واحد منهم عايز يورث منصبه لابنه(معلش يا أبو سيف) ولا واحد منهم خالف قانون الأرض ولا قانون السماء بجلسته هذه
يكون بيتغدى بيتعشى بيعمل اللي بيعمله ماحدش ليه عنده حاجة
والموضوع مش محتاج تبرير ولا اعتذار
وامن الدولة لو مش عاجبهم يضربوا دماغهم في الحيط
ولازم يعرفوا ان البلد بتاعتنا مش بتاعتهم
بتاعت سبعين مليون مصري
مش نص مليون حقير قاعدين على مراوحها لما فطست وفلست
فرجه قريب ان شاء الله
فرجه قريب ان شاء الله
فرجه قريب ان شاء الله

غير معرف يقول...

حسبى الله ونعم الوكيل

غير معرف يقول...

ربنا يجعله فى ميزان حسناته

غير معرف يقول...

عارف يا ابوسيف الظباط لو فيهم خير يجمعوهم كلهم فى سجن واحد الشاطر وشلته والعريان وشلته ويسبوهم مع بعض والنتيجه هتبقى خير ؟؟؟؟؟

غير معرف يقول...

السلام عليكم يا أبو سيف
على قد ما أنا مستاء وقرفان من الي بيحصل، بس حاسس إن هو الطريق دة اللي حيطهر مصر من الأوساخ دول. مش بعيد يقولوا ان العربيات دي تمويل من السودان لقلب نظام الحكم. طبعا مش عربيات القيادة يا باشا. صحيح هي عربية عمو سيد مش جامدة أوي، بس تسد برده، واهي حلوة للتمويه
إذا لم تستح فاصنع ما شئت، مش قالوا ان هم حرزو معاهم 20 ألف جنيه(يا اولاد الكلب هو ده كتير على 16 راجل محترمين واصحاب أسر، ما انتو كروشكو مليانة من عرق الغلابة واديكو ملوثة بدم الضحايا الأبرياء). حاجة طبعا غريبة ماهو الي معاه فلوس في مصر دلوقتي يبقى مجرم وبعدين دول مش حرامية يبقى جابو مبلغ ضخم زي دا منييييييييييييييين؟ لا حول ولا قوة إلا بالله
قلبي معاكو يا ابو حميد
بوسلي الواد سيف