2007-03-19

إللى خايف منه حصل

مش عارف انتو معايا إن الأمور زادت عن حدها شويتين تلاته وللا إيه رأيكم .... لا مؤاخذه أنا بأتكلم عن بلدنا المحروسة
.
الأوضاع الداخليه بقت شئ صعب جدا جدا على جميع الأصعدة سواء سياسياً وللا إقتصاديا وللا إجتماعياً .. الوضع بقى خطير
.
شله من الفسده والمفسدين قاموا بالإستيلاء على البلد وعمالين ينهشوا فيها ويقطعوها ويمصمصوها حته حته ... والمشكله إن الغالبيه العظمى من سكان المحروسه ولا هما هنا وضاربينها طناش
.
حتى لما بتوع كفايه قاموا بالدعوه لعمل وقفه فى ميدان التحرير للإعتراض على التعديلات الدستوريه كان العدد هزيل جداً وكأن الغالبيه العظمى من سكان المحروسه موافقين على التعديلات أو حتى فاهمين يعنى ايه تعديلات
.
والمصيبه السودا إن فى كل موقف مشابه العصابه إياها بتحاول تظبط حاجه على مزاجها ما بيقفلهمش حد إلا الإخوان وشوية أفراد والنتيجة إن الحكومة تقول تلم شوية من الإخوان وتحطهم فى السجن
.
وبرضه الغالبيه العظمى من سكان المحروسه ما حدش بيتكلم وللا بيعترض وكأنهم موافقين ضمنياً على اللى بيتعمل مع أى راجل بيقف قدام العصابه المستوليه على المحروسه
.
حاجه تنرفز جداً ... والمصيبة السودا إن اللى كنت خايف منه حصل
.
كنت فى أول تدوينه قلت إن من الأسباب الرئيسية اللى خلتنى أعمل المدونه إنى ألاقى متنفس عن اللى جوايا
لأن الوضع المصرى بقى ينرفز جدا ( زى ما كتبت من شويه) وإنى لو ما فضفضتش واتكلمت حيجيلى ضغط وللا سكر
.
الجديد بقى إنى ما جاليش ضغط وللا سكر ... بس مرارتى ما استحملتش ... كانت حتموتنى الأسبوع اللى فات وفى الآخر عرفت إن مرارتى لازم اعمل عمليه واشيلها لأنها ملتهبه وفيها حصوه كمان
.
وتقريباً المراره التهبت بزياده لأنى بقالى شهر نفسى مسدوده جدا جدا عن إنى اكتب أى حاجه فى المدونه ... وفضلت أكتم فى نفسى لحد ما حصل اللى حصل
.
أمرى إلى الله ... أدى اللى خايف منه حصل ... ربنا يستر على الباقى
.
.
وسلامو عليكو

هناك 21 تعليقًا:

غير معرف يقول...

شفاااااااااااك الله وعافاك يا حبيبي.. ألف سلامة عليك.
يشيل منك ويحط على حسني والزبالة اللي حواليه..
طهور إن شاء الله.

م.حسام فتحي يقول...

بص يا أخي
أولا انت مالك ؟ هي كانت البلد بلدك ولا الناس بتوعك ؟ دي البلد بتاعت ربنا والناس عبيده سبحانه ، وارادة الله ان كل شوية يتعمل اختبار بيدخله الجميع غصب عن عنيهم بس ما بينجحش فيه الا المتقين .. عندك شك في كده طبعا لأ ..طيب عايز الاختبارات تتوقف ؟ ياريت كان غيرك أشطر وأتقى وأقرب الى الله ومع ذلك الاختبارات في عصره ما توقفتش "فمنهم من قضى نحبه ومنهم من ينتظر وما بدلوا تبديلا"
يبقى ايه يفقع مرارتك ؟ يبقى هم واحد وهو إزاي أكون من الناجحين في الامتحان أنا ومن ألي أمورهم واللي باحبهم واللي أمرهم يهمني ؟ .. أغششهم جائز شرعا .. أنصحهم ؟ ممكن أغلس عليهم ؟ يجوز ولكن الى حدود أكتر من كده مالكش ياحلو .. مالكش تغصبهم ومالكش تزعل الا اذا كنت قصرت
ليه باذكر نفسي وباذكرك بالكلام ده ؟ لأن فيه امتحانات كتيييير بتيجي لكل واحد فينا لوحده أو على ليه مع عائلته أو لبلده والواحد ينشغل جدا بكل حاجة في الامتحان ده الا بنفسه وربما تنجح العيلة وتنجح البلد وأسقط أنا .. أسقط بنيتي ، أو أسقط بعملي أو أسقط بتقصيري .. والله دي يا أخي ماهي فلسفة ولا فزلكة ولكن خبرة السنين وسؤال الصالحين
وفي النهاية كما قلت لك قبل ذلك تذكر قول ابن عطاء الله السكندري
ربما يؤلمك المنع لعدم فهمك عن الله فيه
وقوله
لو أحسنت الأخذ عن الله لرأيت المنع عين العطاء
وتذكر دائما يا أخي أن للكون اله وما نحن الا ستار لقدر الله وقدرته كما يقولون نستر القدرة ونأخذ الأجرة
ومهما احتشد الأحزاب فالله غالب على أمره ولكن أكثر الناس لا يعلمون
شفاك الله وعافاك من كل مكروه وسوء
وأسأل الله أن يهدي قومنا فإنهم لا يعلمون وأن يخرج من أصلابهم من يوحد الله عز وجل ولا يشرك به شيئا

الكواكبي يقول...

الف الف سلامة على مرارتك . . كويس ان مرارتك بس اللي اتفقعت :)
وبالمناسبة الأخ اللي فوق اللي كاتب لك طهور ده بيلمح لحاجة لا سمح الله انت بتقول عملية المرارة وهو بيسأل برضه طهور ان شاء الله!! لا يا سيدي مش طهور . . احمد صاحبي وانا متأكد منه كويس
اوعى يا ابو سيف يكون اللي في بالي لسه ما حصلش ؟!
عموماً لو لسه احب اطمنك انت واللي في حالتك ان الأمم المتحدة اكيد هاتظبط لكم حاجة قريب
هيص يا عم مش هاتعمل العملية وما حدش هايذلك تاني ويكتب لك طهور ان شاء الله

غير معرف يقول...

الف سلامة ياعسل
انا مش عارف اخرة اللى بيحصل لينافى البلد اللى مش ولا بد دى ايه .. امراض وحرق دم وتلوث وجنان وتخلف عقلى وكساح .. نفسى ياحاج احمد نعدى مرحلة (ان احنا نقعد جنب الحيط نهرى فى نفسنا)اللى انته خايف منها.. الى مرحلة (اننا نبدا نتحرك ونطلع كبتنا على الظلمة باى شكل من الاشكال ) .. بكدة تاكد ان احنا حتبقى صحتنا زى الفل وهمه اللى ربنا حيبتليهم بكل البلاوى الزرقا ..
قول آآآآآآمين
محمد نزيلى

أبوســـيف يقول...

والله يا بشمهندس حسام كلامك تمام ... بس لولا ان ده شئ عادي ان الواحد يبقى متضايق من الوضع بتاعه وزعلان على الناس
زى ما ربنا خاطب سيدنا محمد فى سورة الأنعام (فلعلك باخع نفسك على آثارهم إن لم يكونوا مؤمنين ) بس حأحاول فى المرات اللى جايه ان ما اخدش على صدرى ربنا يستر

أبوســـيف يقول...

طبعا لما بشوف تعليق من الكواكبي بقول ربنا يسترها علينا من طولة لسانه
وهو ماخيبش ظنى المرادي

ماشى يا كواكبى - وشكراً على شهادتك فى حقى

------

أ. محمد نزيلي
آمين يارب يسمع من بقك ربنا

غير معرف يقول...

قال القشيري: والحزن على كفر الكافر طاعة؛ ولكن النبّي صلى الله عليه وسلم كان يفرط في الحزن على كفر قومه، فنهي عن ذلك؛
و قوله تعالى "ما أنزلنا عليك القرآن لتشقى"
فسره القرطبي : لتشقى "لتتعب" بفرط تأسفك وعلى كفرهم وتحسرك على أن يؤمنوا كقوله تعالى "فلعلك باخع نفسك على آثارهم" [الكهف: 6] أي ما عليك إلا أن تبلغ وتذكر ولم يكتب عليك أن يؤمنوا لا محالة بعد أن لم تفرط في أداء الرسالة والموعظة الحسنة
كما ورد النهي عن الاسراف في الحزن في قوله أفمن زين له سوء عمله فرآه حسنا، فلا تذهب نفسك عليهم حسرات، فإن الله يضل من يشاء ويهدي من يشاء.
وقوله
فلعلك باخع نفسك على آثارهم إن لم يؤمنوا بهذا الحديث أسفا
وقوله
وإن كان كبر عليك إعراضهم فإن استطعت أن تبتغي نفقا في الأرض أو سلما في السماء فتأتيهم بآية ولو شاء الله لجمعهم على الهدى فلا تكونن من الجاهلين
والقرآن مملوء بآيات كثيرة على ألسنة الأنبياء السابقين الى قومهم أو من الله عز وجل الى النبي صلى الله عليه وسلم
والله ولي التوفيق

shahin يقول...

السلام عليكم
شوف ياحاج احمد اول حاجه الف سلامة على مرارتك وخلى بالك من نفسك مش عايزين فضايح, بالنسبة لمصر بقى واللى بيحصل فيها لو حد غيرنا كان قال تتحرق البلد واللى فيها وحسنى يجى او ابنة او حتى الموزة سوزى مش مهم بس نعيش بس احنا مشكلتنا بنحب البلد دى قوى وبنحب ناسها فعلشان كده لازم نعمل زى رسولنا صلى الله عليه وسلم ماعلمنا إذا جاء أحدكم الموت وفي يديه فسيلة فليغرسها فاحنا لازم نغرس اللى هما عايزينه ان احنا نقعد جنب الحيطه ونعيط علشان القطر يقف بس فسيبك من الكلام بتاع الضغط والجدرى والكلام اللى يمرض ده واشتغل كل ماتتعب اشتغل اكتر وربنا معانا ومعاك.
صحيح نسيت الكلام بتاع الكواكبى ده ايه ظرفة مش عايزبن فضايح فى العيلة الله يكرمك.
محمد مختار

أبوســـيف يقول...

يا شاهين يا اخويا
اللى بأكتبه ده مش معناه ان الواحد قاعد يندب حظ البلد العاثر ويشيل فى نفسه
الواحد بيحاول يعمل كل ما فى وسعه بس دمه عمال يتحرق

غير معرف يقول...

لو كنا بنمشي زي ما ربنا أمر وزي ما رسولنا صلى الله عليه وسلم كان بيعمل في دعوته من البداية مع الصحابة وكان في دعوة سرية وبعدين علنية وجهاد وخلافه كنا فلحنا لكن للأسف إحنا عاملين زي اللي رقصت على السلم لا منها كده ولا كده، والسكوت على الظلم بجميع أنواعه زي اللي بيحصل الآن من تعدي على الأرواح والأعراض والأموال هو اللي جيبنا ورا. لازم يكون في تخطيط سليم لإدارة المرحلة الحالية بنظرة شمولية ويجب عمل حسابات يشترك فيها أعضاء الجماعة والمعارضة في الداخل والخارج للقضاء على هذا الظلم ومحاولة التغيير بكل الطرق الممكنة. لا يكفي الشجب ولا الشكوى والشكوى لغير الله مذلة.
القرب من الله بالعبادة و الطاعات والبعد عن المحرمات والمنكرات يساعد المؤمنين على التحمل والصبر على البلاء وأيضا يساعدهم على اتباع الحق وما يقرب إليه من قول وعمل، ((ربنا آتنا من لدنك رحمة وهيء لنا من أمرنا رشدا))

محمود سعيد يقول...

شفاك الله وعافاك

طهور إن شاء الله (غصب عن إسلام)

وربنا يكتب لمصر الخير ويريحنا ويريحك

mohamed elbanna يقول...

الف سلامة عليك يابو يوسف
ايه ياعمنا هو احنا كل ما نصلحلك حاجة نلاقى حاجه تانية ضربت ولو مؤاخذة
طيب خلى بالك بقه فى حاجات مش هنعرف نصلحها
وربنا يسترها
الوضع يستحق الحزن ولكنه يستحق التفكير بعمق أيضا
وربنا موجود وما زال يملك الأمر كله وبيدة ملكوت كل شئ وهو القادر على كل شئ

أبوســـيف يقول...

البنا باشا
والله يا أخويا أعمل ايه مش بإيدي ربنا يستر ... هو تقريباً فى مستهدف قبل ما اكمل 40 سنه اكون شلت كل حاجه ممكن تتشال من جسمى : زائده مراره غضروف .... إلخ
ربنا يسترها على عبيده

______

mosaadms@hotmail.com يقول...

السلام عليكم ورحمة الله وبركاته /
أخي أبو سيف ألف سلامة عليك ,, وإن شاء الله تكون في ميزان حسناتك ,, أما بخصوص أحوال البلد بصراحة مفيش حاجة هتتغير إلا بتغير الناس , والناس مش هتغير ألا لو حصلت نصيبة كبيرة عشان يرجعوا لدينهم و يبطلوا سلبية ...أنامش بتمني ده يحصل بس هو دة الواقع , ...وعلي العموم ربنا يبعت واحد زى محمد علي عشان يخلصنا من المماليك تاني ....
أبو خالد

أبوســـيف يقول...

الله يسلمك يا أبوخالد

بس موضوع محمد على ده مش عاجبنى .. لازم يحصل تغير حقيقي فى نفوس الناس كلها ويبطلوا سلبيه وجبن ولا مبالاه

من غير كده برضه مش حينصلح حالنا .. ولو جه محمد على برضه حيسيبوه يناضل لوحده

FadFadA يقول...

يقول الأستاذ سيد قطب " نحن نستر القدرة و نأخذ الأجرة "0
فقدر الله سائر لا محالة , و مشيئته ستكون , و أمره بين الكاف و النون و إذا أراد شيئا إنما يقول له كن فيكون
و ما علينا إلا أن نتحرك , و يجب أن نعلم جيدا أنه مهما تحركنا فلن يكون إلا ما شاء الله , و إنما نتحرك لإن الله أمرنا بذلك , فالأخذ بالأسباب واجب و عبادة لله عز وجل
فيجب أن ننظر إلى العمل و نجنهد ألا تؤثر فينا النتائج
بالطبع سنغضب كثيرا , و نحزن مما يحدث , و لكن يجب ألا تؤثر في تحركنا و عملنا
و احنا محتاجينك يا أبو سيف فخللي بالك من نفسك
و ألف سلامة
محمد

Amr Fathy يقول...

يا عم أحمد

أولا ألف سلامة يا ريس، متعملش في نفسك كدا، عيالك عاوزينك، هدي أعضاءك كدا وخليك كالم. يا سيدي الفاضل كفاية استعلاء على المصريين البسطاء، ومتخلهمش الشماعة اللي تعلقوا عليها فشلكم، أنا مش عارف بالظبط انتو عاوزين منهم إيه، يا أخي الغالبية العظمى من الأمريكان بسطاء، ولا يهمهم إيه اللي بيحصل في السياسة طالما عارفين يعيشوا، وعلى فكرة في نسبة كبيرة منهم إمكانياتهم محدودة للغاية، لكن لأن القيادة بتعترف بحق الناس دول في إنهم يعيشوا كويس، فالناس دول عارفين يعيشوا، ولو فيه مشكلة واجهتهم مبيثوروش بالرغم من إن محدش هيسألهم حتى إنتو ثايرين ليه، ناهيك عن إن محدش هايضربهم ولا يعتقلهم .. إلخ.

أما أهالينا الطيبين بجد مش عارف انتو عاوزينهم يعملوا ايه بالظبط، يا أخي المتابع للأخبار في الفترة الأخيرة، عينه مش هتخطئ أخبار من قبيل : اشتباكات بين أهالي القرية الفلانية والشرطة بسبب رفض الناس تركيب محطة محمول في القرية أو اضرابات العمال اللي شغالة كل يوم في مصر أو موظف بسيط غلبان مرتبه 400 جنيه رفض رشوة مش عارف بكام ألف .... إلخ
هما دول الناس الغلابة اللي عمالين تشتموهم إنهم سلبيين وجبنا، يا أخي هما هيلاقوها منكم ولا من الحكومة، اللي عاوز يشتغل عمل عام، يشتغل ويستحمل، بس ميعلقش فشله وإحباطه على الناس الغلابة، سيبوهم في حالهم يصارعوا مع الحياة علشان يعرفوا يعيشوا

محمود سعيد يقول...

من زمان غايب
إن شاء الله خير

محمد السيد يقول...

سلامة مرارتك يا استاذ ...

بس صحيح ... هي لغاية دلوقتي كانت سليمة ومحصلهاش حاجة...........




ده انت معجزة في عالم من غير معجزات يا افندم

hamsawy يقول...

please add me to ur list
www.hamsawy.blogspot.com

hamsawy يقول...

please add me to ur list
www.hamsawy.blogspot.com