2007-02-12

يوم الجمعه إللى فاتت

اليوم : الجمعه 9 فبراير
الزمان : قبل صلاة الجمعه بساعه إلا ربع
المكان : أمام باب الجامع الأزهر
إيه إللى حصل : وصلت عند الجامع ولقيت كمية عساكر أمن مركزى لم أراها محتشده من قبل بهذا الشكل ، ومعاكم كمية من الرتب الكبيرة فيهم حوالى 3 لواءات شرطه من اللى ما بينزلوش من مكاتبهم إلا للشديد القوى ، دخول الجامع كان بالبطاقة الشخصية وده إللى ما بيحصلش إلا فى دخول أفلام للكبار فقط
فى اليوم ده كانت طريقة تعامل ضباط أمن الدوله فيه كثير جداً من الإستفزاز - وكلمة إستفزاز دى كلمه مؤدبه لوصف إللى عملوه - المهم سابوا شويه يدخلوا المسجد وبعدين قفلوه راحت الناس قالت خلاص حنصلى فى الشارع الكلام ما عجبش البشوات قاموا خللوا العساكر يهجموا على الناس اللى قعدت فى الأرض ، وقدام عينى شفت أكتر من واحد مالحقوش يقوموا والساده الأشاوس عساكر الأمن المركزى فرموهم تحت الجزم الميرى ، وقاموا خطفولهم كام واحد وحطوهم فى البوكس وختموها بأنهم خدوا عمنا الكبير أ. محمد عبد القدوس
فوجئت وأنا مروح يومها بعد ما وصلت لشارع بورسعيد إن الأمن قافل شارع الأزهر بالكامل ومانع أى عربيه أو شخص من الدخول فى شارع الأزهر
إللى فات كان وصف للى حصل يومها أم الجامع الأزهر عشان اللى ما شافش ... طيب ليه المقدمه اللى فاتت ؟ ...اقولك أنا

الملاحظ الآن
أن الحكومة بتتعامل بعصبية شديدة فى ردود أفعالها على أى تجمعات ، وأنه بهذه العصبية تقوم بالضغط على فئات أخرى فى المجتمع فتتحول هذه الفئات الأخرى من فئات محايده إلى فئات كارهه وناقمه جداً على الحكومة، وبالتالى تحركات الحكومة العصبية فى هذه المرحلة تكسبها المزيد والمزيد من الكارهين
أسلوب تعامل الحكومة العصبي واللا معقول مع المعارضه وبالأخص مع الإخوان يعطي مؤشر بأن الحكومة أصبحت هشه جداً وخائفة جداً وأنها قربت تسلم نمر
وفى هذه المرحلة وبالوضع الحالى للنظام يجب على كل القوى الوطنية أن تكون أكثر تركيزاً فى التعامل مع النظام سواء إعلامياً أو فى شكل الحركه وشكل التجمعات حتى يتم الضغط بشكل أكبر على النظام المصرى

ولا أخفيكم سراً إن اللى حصل يوم الجمعه اللى فاتت بالذات هوا اللى دفعنى انشئ المدونه وإنى أكتب الموضوع ده


الكلام إللى مكتوب ده مش مقال ولا دراسه تحليليه ولا أى حاجه من الحاجات الجامده دى .... دى مجرد فضفضه بأخرج فيها إللى جوايا عشان ما أطقش

هناك 14 تعليقًا:

غير معرف يقول...

الله ينور عليك يا ابو سيف استمر
فيجب ان نخرج ما بدخلنا وان نحرر ألسنتنا للحق

الكواكبي يقول...

مرحباً بك في عالم المدونين . . تقدر تقول كده انك ركبت لنفسك اول سلك ارضي لتفريغ شحنات الفرسة الزيادة
استمر وفضفض ودع كيبوردك ينطلق :)

Amr يقول...

ارجو ان تكون هذه الفضفضة ذات فائدة مرجوه وان لم تكن نرجوا ان نجد طريقة لتكون كذلك

أبوســـيف يقول...

السلام عليكم

شكراً جزيلاً يا كواكبي وانت من الرواد
صاحب التعليق الأولانى شكراً جزيلاً وكان نفسي تكتب إسمك

كنت عايز أقول لك يا أ. عمرو إنى وضحت الفائده المرجوه فى بداية تدوينى ألا وهى انى لو ما فضفضتش حيجيلى ضغط أو سكر وانت مايرضيكش كده وللا إيه
الفائدة الأخرى إن أى موضوع بأكتبه نعتبره قضيه مطروحه للنقاش ممكن أكون مخطئ فى تصوراتى ، وأظن النقاش حيخللى اللى مايعرفش يعرف والمخطئ يبطل خطأ ويتعلم الصح
وللا إيه رأيك .... سلامو عليكو

Ahmed Qenawy يقول...

اعتقد انه ان الاوان لكى نكون اكثر ايجابية فى التعامل مع مشاكل حياتنا
فمصر ملكنا نحن وديمقراطيا طبقات الشعب الشريفة الكادحة نمثل اكثر من 90% من هذا الشعب ويتبقى 10% من الاقطاعيين والمصلحجية والمفسدين والمنافقين والعملاءو...إلخ.
وبالتالى لابد ان تتجمع راياتنا سلميا حتى تسد الأفق وتمنع مسار غير الشرفاء من الوصول لسدة الحكم والتحكم فى مصائر السواد الاعظم من الشعب الذى يعانى الويلات ويتجرح كأس المرارة وينتظر ربع فرصة تجعله يتحسس بها الطريق نحو دائرة ضوء حقيقية...ربما حينما يصل اليها يجد هواء نقيا يستنشقه..ليعيته على الحياة ...لانه ببساطة ستحقها!.

أبوســـيف يقول...

الله ينور عليك يا م. أحمد
أهه الـ 10% الإقطاعيين والمفسدين اللى بتقول عليهم شمين نفسهم عشان الـ90 % محدش فيهم بتكلم ولا بيفتح بقه
بس أظن ان الواقع ده بدأ يتغيرك وكانت بشايره على إيد المحلاويه فى أزمه مصنع المحله الكبرى ... وأظن ان كتير من الـ 90% بدئوا يعرفوا اهميه انهم يتحركوا ويطالبوا بحقوقهم... وده المهم
سلامو عليكو

غير معرف يقول...

شئ طيب ان احنا نفضفض ونخرج اللى فى نفسناواصعب شئ اللا نتمكن من ذلك ( ويضيق صدرى ولا ينطلق لسانى) وأهم من ذلك أن نخرج إلى مرحلة بناء وأفكار جاده لترميم شئون الأمه ورسم طريق للنجاه وإثراء ذلك بأفكار جاده للخروج من المأذق الذى أوقعنا فيه الطغاه

السيد نزيلي

أبوســـيف يقول...

جزاك الله خيراً يا أبى
ويا أستاذى ومعلمي

Hossam يقول...

أخي الحبيب
أسأل الله العظيم أن يجعل عملك هذا في ميزان حسناتك يوم القيامة وأن يجعل لك فيه نية صادقة ثابتة هي جديرة بك وأنت بها جدير وأن ينفع الله بها من يقرأها أو يشارك فيها وأن تكون هذه المدونة منبرا لإعلاء كلمة الله في أرضه وإني كلما قرأت قول الله تعالى "وَأَوْحَيْنَا إِلَى مُوسَى وَأَخِيهِ
أَن تَبَوَّءَا لِقَوْمِكُمَا بِمِصْرَ بُيُوتاً وَاجْعَلُواْ بُيُوتَكُمْ قِبْلَةً وَأَقِيمُواْ الصَّلاَةَ وَبَشِّرِ الْمُؤْمِنِينَ"
أحس أنه لابد أن يوفر المؤمنين للناس قبلة يتوجهوا اليها وما أجمل الإفراد في كلمة قبلة مع الجمع في كلمة بيوتكم فالقبلة لا تتعدد وان تعددت البيوت وأرجو أن تكون مدونتك هذه قبلة لكل من يرجو الله واليوم الآخر
أما موضوع الضغط والسكر والشاي وغيرهم من مواد التموين ستجد أن مدونتك هذه من مصادرها وليس من مصارفها وقانا الله وإياكم من كل سوء
وأنا أحبكم في الله

senosy يقول...

اخي الحبيب ارجو من الله ان يكون هذا العمل في ميزان الحسنات ان شاء الله يوم القيمة
اخوك محمود سنوسي

غير معرف يقول...

السلام عليكم ورحمة الله وبركاته /

والله شئ طيب الكلام المكتوب , وكويس أنك بتخلينا نعيش بعض التجارب معاك , وأن شاء تستمر في الكتابة بتلك المدونة , ونسأل الله أ، يجعلها مي ميزان حسناتك .....

أخوك أبو خالد

Fadfada يقول...

السلام عليكم و رحمة الله و بركاته
أخي الحبيب
فإن مع العسر يسرا , إن مع العسر يسرا
أقول : الشمس لا تزول
بل تنحني
لمحو ليل لآخر
.. في ساعة الأفول

أقول
يبالغ القيظ بنفخ ناره
و تصطلي المياه في أواره
لكنها تكشف للسماء عن همومها
و تكشف الهموم عن غيومها
و تبدأ الأمطار بالهطول
.. فتولد الحقول

إذا رأيت الصحراء تمتد و تمتد , فاعلم أن وراءها رياضا خضراء وارفة الظلال
إذا رأيت الحبل يشتد و يشتد , فاعلم أنه سوف ينقطع
مع الدمعة بسمة , و مع الخوف أمن , و مع الفزع سكينة

و علينا العمل و التغيير فإن الله لا يغير ما بقوم حتى يغيروا ما بأنفسهم
و هذا وعد من الملك الذي بيده ملكوت كل شيء
أخوك محمد عبدالله

أبوســـيف يقول...

السلام عليكم ورحمة الله وبركاته
بقالى كام يوم ما دخلتش على المدونه أصلى بعيد عنكم كنت عيان شويتين .. دعواتكم
الأستاذ حسام ده أخويا الكبير وحبيبي ربنا يكرمه ... بس ده كلام كبير عليا ربنا ييسر
جزاك الله خيرا يا أبو خالد ربنا يكرمك
الأستاذ محمد عبد الله صاحب مدونة فضفضه كلامك فى محله وأنا سعيد بمشاركتك معايا .. شكر الله لك
سلامو عليكو

أبوســـيف يقول...

محمود سنوسي بنفسه يكتب لى تعليق
دى حاجه عظيمه جداً ... شكره يا حودا سلامى لكل أهل السودان