تقبل الله منا ومنكم

.

كل عام أنتم بخير..وتقبل الله منا ومنكم

.

كده الواحد حيقدر يتعامل مع العيد على أنه عيد .. حيقدر يصحى من الفجر يصلى ويلبس الجلبيه ويروح مصلى العيد ويزور القرايب فى البلد واتصل أعيد على الأصحاب وآخد العيال أفسحهم وآكل الكحك

.

كل اللى فات كان صعب الواحد يعمله أو ممكن يعمل جزء منه بس من غير نفس .. حتى كان ممكن آكل كحك بس طعمه ماكانش حيكون حلو لولا خروج أبى من السجن

.

.ده ماكانش حيكون إحساسى أنا وبس ده كان حيكون إحساس أمى واخواتى سواء اللى فى مصر وإللى بره مصر .. وكان حيكون إحساس أهل بلدنا كرداسه اللى قابلوا الوالد بمظاهرة حب رائعه لما نزل يقدم واجب العزاء ثالث يوم خروجه من السجن

.

بس للأسف الفرحه ما كملتش ... يمكن قبل كده الواحد كان بيقضى العيد مع الوالد وهو زعلان شويه على إخواننا اللى مازالوا فى السجن وعلى أولادهم اللى حيقضوا العيد من غيرآباؤهم ... بس المرادى إحساسى مختلف يمكن عشان لسه الواحد خارج من تجربة مشابهه حسيت فيها بإحساس أهلهم

.

.يوم الثلاثاء قبل الماضى كنا بنزور أبي فى السجن آخر زيارة .. وبعد ما قعدت معاه شويه إستأذنته وخرجت من سجن عنبر الزراعه ودخلت السجن الملاصق له وهو مزرعة طرة كان نفسى أشوف إخواننا وأساتذتنا إللى فى العسكرية لأنى من ساعة ما تم القبض عليهم لم أراهم .. حتى لما اتقبض عليا من ثلاث شهور وحطونا فى مزرعة طره فصلونا عنهم وما تمكنتش من رؤيتهم

.

شفت م. خيرت وكالعاده ذاكرته أكثر من رائعه افتكرنى وسألنى عن إخواتى واحد واحد وعن أزواج إخواتى

سلمت على أ. حسن مالك

شفت كمان إخواننا الجيزاوية فك الله أسرهم الخلوق الدكتورعصام حشيش و الدكتور عبد الرحمن سعودى ود.عصام عبد المحسن و أ. ياسر عبده

شفت أ. صادق الشرقاوى وهو فى حد ذاته نموذج رائع

كمان شفت زميل الدراسة أ. محمد مهنى أصغر المتهمين فى العسكرية اللى كان معايا وسابقنى بدفعه فى تجارة عين شمس

.

وللأسف لم أتمكن من رؤية د. محمود غزلان وماشفتش أى حد من إخوان المنوفية اللى كانوا جيراننا فى عنبر ثلاثة وقت ما كننا فى المزرعة

.

رؤية إخواننا بقدرما اسعدتنى جداً بقدر ما أهمنى التفكير فى أهلهم وأولادهم وإزاى حيقضوا العيد من غيرهم

..

تقبل الله منا ومنكم صالح الأعمال